zämekumft


do häsch di scho lang vorhär uf da fäscht gfreut
bisch gschpannt gsi wär vo früener ales chöm
die hundert schtuz wo’s koscht hät
händ di nid greut
du froogsch di jo scho lang wes allne göng
wo und wie händ’s gläbt und was händ’s gmacht
sid säler ziit
am nögschte samschtigoobig würsch es gsee
dänn isch es so wiit


und dänn chunsch hii und ali händ’s dr gwunke
di ainte ooni hoor par anderi grau
und aine zimli tikk und an hät ghunke
und wider an isch ez scho zimli blau
läkk mir hei git’s di au no hoi we goot’s
und we bisch zwääg
und dänn isch alls we doo we wän’s die joor
sidhäär nid gääb


und dänn würt gschwäzt und glachet
tüüf i d’nacht ie
di alte ziite läbed wider uuf
dänn loosch di vo de guete schtimmig mitzie
bisch fröölich we scho lang nüm und guet druuf
vergässe ali lämpe und all probleem
bisch glööst und frai
und füülsch di i däm chrais vo alte fründ
wool und dihai


und dänn würd’s ziit und märksch
chasch nüme faare
laufsch hai und liisch is bett und würsch der klaar
bi all däm gschwäz häsch letschtlich nünt erfaare
vo däm wo’d du vorhär gärn gwüsst hetsch ghaa
kai aanig wie händ’s gläbt und we’s ne goot
das tunkt di schlimm
und dänn schtoosch nomol uf
und nimmsch no gschwind
es aschpirin