wösch

bevor si goot sait si no waisch
wänn’t mol mosch wäsche, gäll dänn traaisch
s’innwändig vo de wösch noch usse
bevor’d si i d’maschine ine laisch
machsch türe ganz fescht zue
truksch s’programm, dänn häsch rue
pass uf dass d nid z’vill pulver ine ghaisch

will, aagno türe isch nid zue
dänn wird das nüüt mit diner rue
dänn lauft es wasser uus und fluetet
zersch nu de bode, schpööter d’schue
da git e schwainerai
und z’buzze git’s für drai
und d’wösch chasch au grad no mol über tue

dänn wäälsch es programm, gisch es ii
bis bi de sach dänn do debii
will, wänn’d en pulli z’haiss tosch wäsche
dänn chunsch dänn nochhär nüme drii
trännsch bunts und wiisses gäll
will s’wiis verfärbt no schnäll
und goppel joo nid z’haiss susch würd alls z’chlii

das wägem pulver seg no gsait
will, aagno hetsch z’vill ine ghait
dänn fangt’s mit sicherhait aa schuume
erheblich mee als dass’s vertrait
nid z’wenig und nid z’vill
nu da wo s’bruucht, wo s’will
s’wär schaad, wänn s’nu wäg däm dänn abverhait

dass’d au no folgendes verschtoosch
wän’t mol mit wösch uf d’schtäge goosch
träg nie mee wösch dass’d nüm chasch luege
öb’d nid no zmänd uf s’büsi schtoosch
susch machsch em büsi wee
au du verschrekksch, würsch gsee
und wette dass’d au d’wösch dänn ghaie loosch

2009