8. traum


machsch d’auge zue
wetsch nüme gsee was ales um di goot
wetsch flüchte in din schloof
dass d nüme schnallsch we’s um di schtoot
im traum
isch alls no we doo


döt findsch di als dä bueb
wo du vor vilne joor bisch gsii
verschpillt und übermüetig
und bi jedem schpass debii
din traum
und wes mol isch gsii
isch vorbii


ez liisch hilflos do
würsch nie me schto
und würsch nie me go
we doo


und dänn träumsch vo de schuel
bisch mit de fründe underwägs
we’d gfiiret häsch und gfäschtet
und we’d glachet häsch und gschwäzt
im traum
isch alls no we doo


und bizzli schööter träumts’s dir
vo dim umfall wo isch gschee
und ob däm traum verschrekksch
wachsch uuf und muesch diis eeländ gsee
dä traum
dä albtraum macht wee
so wee


ez liisch hilflos do
würsch nie me schto
und würsch nie me go
we doo