6. tschutte


wänn di ainte massiert im sächzener schtönd
und di andere bewusst ires schpiil ufzie lönd
aifach lueged dass disi ka gool mache chönd
dänn schpiled’s uf konter


und wänn sich dänn plözzlich e schangse ergit
dass si trozdäm de ball händ
dänn gänd’s em en tritt
und an ränt we vergiftet und nimmt de ball mit
chunt zum abschluss


und wäner dänn trifft rüefed ali lüüt gool
d’schpiler zaiged ganz düütlich ez isch’s ene wool
und si tanzed und schtripped und rammled frivool
händ freud halt


di andere wo vorhär da schpiil händ diktiert
lamentiered und lätsched
und sind tüüf fruschtriert
und es duuret es wiili bis jede kapiert
es glükk fäält


dänn kämpfed’s und schwized’s
und räned’s no mee
mached sich sälber und mee no tail anderne wee
bis de schiri pfiift wiler es faulschpiil hät gsee
s’git fraischtooss

di ainte händ fraischtooss und gorner abgweert
und di andere da schpiil
dänn zum schluss gliich no keert
und d’uefa hät aine wo gschpeuzlet hät gschpeert
so isch fuessball