1. paradiis


häsch buechet am meer
im hotel am schtrand
rings um nünt we palme
vor draa wiisse sand
en golfplazz es schwümmbad
ghört ales dezue
döt chasch die entschpanne
döt findsch dini rue


acht wuche schikksch di no drii
das haltisch uus das goot vorbii
und dänn flüügsch hii
und tschäggisch ii
im paradiis


es schtinkt dir go schaffe
din tschop gurkt di aa
de schtress macht di färtig
dä drukk wo’d häsch gha
häsch chunde wo mozzed
de scheff macht dr’s schwäär
bisch müed und bisch uusbrännt
batriie sind läär


vier wuche schikksch di no drii
das goot nüm lang das goot vorbii
und dänn flüügsch hii
und tschäggisch ii
im paradiis


und s’wätter isch mischtig
s’isch näblig und chaalt
sid wuche so trooschtloos
do füült me sich aalt
vo räge und schneematsch
häsch ändgültig gnueg
wetsch furt wetsch a d’sunne
chli wärmi teet guet

und ezzed äntlich bisch im flüüger
und scho glii druuf im paradiis
döt liisch am schtrand
wirsch immer brüüner
dir gfallt die zwangloos läbeswiis


sid volle vier wuche
vorbii und dihai
und d’brüüni isch wäg
und de scheff macht sin schtai
es schtinkt dir go schaffe
de tschopp gurkt di aa
und s’tunkt di vo neuem
dass’d ferie sötsch haa


fufzg wuche schikksch di no drii
dass no so lang goot mööst nid sii
doch dänn flüügsch hii
und tschäggisch ii
im paradiis


ez sind’s scho acht wuche
bisch zrugg und de aalt
und s’wätter isch trooschtloos
s’isch näblig und chaalt
vo räge und schneematsch
häsch ändgültig gnueg
wetsch furt wetsch a d’sunne
chli wärmi teet guet