liebschaft
 
we vil mol hät er schoo
verzellt was längscht vorbii
wo n‘er sälber jung und no
voll chraft und gsund isch gsii
ich käne jedi gschicht
de tonfall i sim bricht
und de uusdruk i sim alte gsicht
 
we vil mol hät er schoo
verzellt mir ganz genau
vome träffe irgendwo
mit’ere zauberhafte frau
vierzg johr sinds här und mee
dass är si nüm hät gsee
und no hüt macht im die alti liebi wee
 
vierzg johr sinds här und mee
dass är si nüm hät gsee
und no hüt macht im die alti liebi wee
 
wänn die frau no läbt
wänn‘s die gliebt no gäbt
hett ich en letschte bschaid
für si
 
vierzg johr sinds här und mee
dass är si nüm hät gsee
und no hüt macht im die alti liebi wee
 
wänn die frau no läbt
wänn‘s die gliebt no gäbt
hett ich en letschte bschaid
vom tod
 
 
2001