2. konsequänt


ich gib s‘rauche uf
wil‘s schtinkt im huus
ich ha kan schnuuf
de bäärg duruuf
ich hueschte e chlii
und chüüche debii
drum dunkt’s mi s’wär besser
ich liesti es rauche lo sii


aber wän’s brännt dänn schtinkt’s au
und rüüche tot’s au
i de füürweer rännsch au
und ghueschtet wird au
ich bin konsequänt
maid’ ales wo brännt
und hami us gsundhaitliche gründ
au vom füürweerdienscht trännt


ch‘ loo’s flörte lo sii
wäg de lämpe debii
ich gib mi nüm hii
für dä schtress wo’s isch gsii
z’vil iise im füür
sind letschtlich au tüür
drum dunkt’s mi s’wär besser
ich liesti’s es isch mer nüm ghüür

familie choscht au
und schtress häsch döt au
und lämpe git’s au
mit de chind und de frau
ich bi konsequänt
stiig uus wän’s mol chlämmt
und ha mi vo frau und familie
halt doch au grad trännt


de füürweer isch künt
ha ka chind und ka fründ
ka frau und ka sünd
und kan schtumpe und nünt
ich bi konsequänt
ha nünt anders kännt
und de räscht vo mim läbe
vor öödheit und langwiil verpännt