kandidaat

ich bi uf schtai go kandidiere

für's högschti amt wo die döt händ

ha dänkt ich chön's ja mol probiere

dänn gseen-i glii öb's mi döt wänd

ich ha mi öffentlich beworbe

wohär i chöm und wär i seg

was i für ziil heb wa für sorge

und wo de schwäärpunkt z'lige heb

e par händ gsait ich söll's lo sii

ich lös mich besser nid druf ii

ich heb nu lämpe und radau

und fruscht und niider heb i au

ich bi vo aim termin zum andere

diräkt vom färnsee zu de präss

bi wenen prediger go wandere

zum d'lüüt bekeere we i de mäss

> und dänn am tag vom erschte waalgang

het's nid erwartet het's nie dänkt

nid s'resultat und nid de aadrang

nid wevil lüüt mir d'schtimm händ gschänkt

zwor händ par gsait ich söll's lo sii ...

ich bi we uf ere wäle gritte

vo liebe fründ i däre ziit

si händ sich iigsezt händ für mi gschtritte

uf das ich joo im räne bliib

< druf abe isch es ruppig worde

de ton persöönlicher und fiis

es hät mer buuchwee gmacht und sorge

alls verdrait gemain und miis

und wider händ's mer gsait ich söll's lo sii ...

di zwait waal hani dänn verloore

und da isch rächt so s'macht mer muet

so hani weniger um d'oore

und schloofe z'nacht au wider guet

2012