aawalt

mit sächzgi hät en aawalt scho vil gsee

hät erfaarig - ka ilusione mee

hät es amt für gwöndlich i de politik

verschafft sich vortail und par andere mit siine trikk

s’wär ziit zum hööre ziit zum langsam goo

de plazz de jüngere jurischte z’überloo

e chlige raise mit de frau e chlige si

ziit zum pfläge was bis ez nid pflägt isch gsi

dänn schtirbt er wäg

das tunkt am zfrüe

und s’macht eim müe

z’verstoo wisoo

das ain mues go

in schönschte joor

das aim de tood

kai zuekumft loot

mit vierzgi schtoot en aawalt i de pflicht

isch voll im saft hät e kanzlai oder schafft am gricht

behandled fäll wägt ab und tänkt sich ii

dänn schpricht er rächt und macht no kasse do debii

dihaime sind e frau und chlini chind

wo sich beklaged well‘s vil zwenig zäme sind

am morge furt am oobig hai tag ii tag uus

und si elai dihai im grosse neue huus

dänn schtirbt er wäg

und s’tunkt am zfrüe ...

... das ein mues go

in beschte joor ...

mit zwanzgi isch en aawalt gwööndlich no

am schtudiere we d’jurischterai söll goo

verfassig und verornig d‘bundesgsezz

all paragraafe und artikel lärnt er ez

am oobig goot’s in uusgang für par piir

dänn würd prelaaged und chli schpööter isch er schtiier

und mängisch träumt er dänn e bizzli vonere frau

vo gält und kariäre träumt er aber au

en chlapf und päng

au das isch zfrüe ...

... das ein mues go

in junge joor ...

und nomol zwanzg joor früener irgendwo

hät e bluetjungs maitli sich es pürschtli gno

hät‘s verwöönt und hät au sich verwööne loo

hät sich vergässe hät sich seelig triibe loo

ernüechterig und schrekk sind risig grooss

en chline fötus wachst im junge maitlischooss

doch ka zuekumft hät dä möglichi jurischt

wiler wägem sachzwang wäggmacht worde isch

z’früe

s’isch immer z’früe

und s’macht eim müe

z’verstoo wisoo

das ain mues go

bevor er do

das aim de tood

kai zuekumft loot

2007