halbhärzig
 

ich käne lüüt die tönd gärn reise
für neus und fremds gänd si sich müe
si bsueched hochland ghöf und weide
vo nepalese und irne chüe
und dänn verzelleds vo kulture
vo däne mensche döt vor ort
we si döt bätted w’s döt puured
begeischterig ghörsch us jedem wort
hingege isch ne bi üs dihei
d‘landwirtschaft einerlei
suschpekt di heimisch puurerei
 
 
 
ich käne lüüt die tönd gärn träume
vomene läbe oni pflicht
genauso we d’nomaade nöime
vo ort zu ort vo gricht zu gricht
und dänn chönds voll begeischterig schwärme
we si s‘nomaadeläbe reizt
und si sich chönted defür erwärme
z’erkunde was so z’läbe heisst
hingege sind ne bi üs dihei
di eigene faarende einerlei
suschpekt di heimisch zigüünerei
 
 
 
ich käne lüüt wo gärn tönd spende
öb chrieg öb süüche oder fluet
es elend wird bestimmt nie ende
uf däre wält flüsst immer bluet
die lüüt nänd aateil a däm liide
und schiked gält wos händ erspart
beduured s’schicksal grad vo chinde
sofern me’s überhaupt erfahrt
hingege sind ne bi üs dihei
di obdachloose einerlei
suschpekt di heimisch bettlerei
 
 
 
1999