güne
 
scho vo chlii aa isch s verlüüre nid sach gsi vo däm bueb
nie wär er cho hüüle wäner hinedrii isch gsi
er hät kämpft und isch voll drii mit häärz und schwaiss und bluet
bis das schpiili drait isch gsii und er gune hät debii
 
i dere bude woner gschafft hät hät er d‘schtifti au scho gmacht
und scho do und dän au schpööter hät er gschuftet tag und nacht
er hät gchrampfet und hät büglet hät sis ziil vor auge gsee
und ka rue gä und nid noo loo bis die bude imm isch gsii
will immer mee
 
i alne läbesdiszipline hät er zvorderscht möse si
de läässigscht schlitte ischer gfaare s’gröschti huus im dorf isch si
di beschte chazze hät er uusgfüert und hofiert wo’s sinn hät gmacht
hät es feriehuus z’ascona und uf em see e schöni yacht
hät ales ghaa
en gmachte maa
 
irgendwänn hät ales keert und es glükk hät en verloo
zersch isch es gält wäg und dänn d’frau und dänn d’chind no hine noo
dän isch es gsundheitlich bergab und är liit im chrankebett
hät döt sin letschte kampf verloore bevor er‘n richtig ufgno hät
so chas goo
 ‘chas chum verschtoo
 
ich ha als chind nu sälte gune und es chrampfe liit mer niid
mis auto isch e göötsche und was i bewone ghört nid mii
ich ha ka yacht und nünt mit chazze und ka firma womer ghöört
aber wän i’s rächt bedänke isch’s mer trozzdäm wool debii
wool debii
was söll‘s mee sii
ch’will zfride sii
 
1999