besserwüsser


ich lis sid mängem joor scho ziitig
wott immer wüsse was so goot
wo git’s en konsäns und was isch schtrittig
und wes um üsers land so schtoot


ich sörfe und schtudiere iluschtrierti
lis jede tegscht und jede pricht
bedänke alls und drum kapier i
de hindergrund vo jeder gschicht


zu alem bild ich mir e mainig
und gar kas thema isch mir z’haiss
es wääred vil mee lüüt sich ainig
wän si nu wüsstid wa n ich scho waiss



ich diskutier a jedem schtammtisch
und kai versammlig looni uus
wän ain so guet we n ich im bild isch
wär är en gwünn für s’bundeshuus


bim schaffe bim schpörtle sogar bim küsse
säg ich i jedem klipp und klar
was sach isch was me aifach mues wüsse
und legem miini sichtwiis dar


wän ich scho iiblikk tue gewääre
mich inedänk i jede schund
und an nid schnallt wa n ich ärchlääre
dän isch er schlicht en tumme hund


noch eme gschprööch bim scheff am friitig
noch ere lange diskussion
hät äär mir künt und das isch mischtig
will oni schtell häsch au kann loon


ez wänd koleege nünt me wüsse
und d’frau isch wäg es huus isch läär
hät gsait ich heb i minere schüssle
en riise schprung und das mach’s schwäär


und i de baiz es isch zum chozze
sobald ich chumm mönd ali hai
wäg däm ghör ich de baizer mozze
doch ändere tot’s nünt ich bliib elai


ich bi nid blööd, bi über d’büecher
ha suuber alls analisiert
s’lauft öppis chrumm s’isch nüm we früener
was isch do goppel nu passiert


ez lis i nünt me, ha mi gwandlet
bi ruig und fründlich mit de lüüt
es isch mer gliich was die alls handled
goot mi nünt aa ich säge nüüt


und sidhär waiss i s’isch öppis woor’s draa
es gääb mee fride und mee rue
wän mee würd gsait das goot mich nünt aa
ich gib min sämpf do nid de zue