ässbebee
 
am morge isch’s vo bärn uf züri äng
hät uu vil volk im zug au i de gäng
bliibsch handum stekke chasch nüm goo
machsch’s we all andere und schloofsch im schtoo
noch länzburg chunnt de kondiktöör
verkündet luut dass jede ghöör
all die wo schtönd die schtönd für d’kazz
ganz hine und ganz vorne heb’s no plazz
 
e faart uf gämf bruucht sini ziit
so quäär dur d’schwiiz isch zimli wiit
und wän’t wiit faarsch mosch no-d’is-noo
beschtimmt emol uf s’wc goo
döt hät scho mänge maa gmaint es goot
genau so guet au wämme schtoot
und hät dur misserfolg bedingt
gmärkt dass’ nid jedem gliich guet glingt
 
am gotthart lueged d’lüüt zum fänschter uus
und gwöndlich maint au an är chömi druus
und schwäzzt ändloos und referiert
we cheertunel und s’chirchli funktioniert
 
mäng ander i däm abtail füült sich gschöört
dä hät de chääs scho fufzg mol ghöört
däm fäält bewunderig für dä bau
doch freut en näbedzue de schtau
 
und dänn isch schluss
faart nüm und schtoot
und s’haisst es chöm scho glii en bus
dänn waisch du bisch im tschisalpino
de zug wo hie und da nüm goot
de zug wo lotteret und loot
de zug wo do und döt mol schtoot